تەرمی ئەو هاووڵاتییانەی كەئەندامی دو خێزان بوون لە باكوری كوردستان كوژران، گەڕێنرانەوە هەرێم و لە دوو شوێن بەخاك دەسپێردرێن.
دوێنێ پێنجشەممە لە شاری نسێبینی سەر بە پارێزگای مێردینی باكوری كوردستان، دەستڕێژی گولـلە لە پێنج هاوڵاتی هەرێمی كوردستان كرا كە خەڵكی دهۆك بوون و ئەندامی دوو خێزان بوون، لە ئەنجامدا هەر پێنج هاوڵاتییەكە كوژران.
بەپێی زانیارییەكان، تەرمی واحیدە حەیدەر و ئەحمەد جەلالەدینی كوڕی لە ناحیەی شیلادزێ بەخاك دەسپێردرێن.
تەرمی عەبدوڵا ساڵح، چیمەن شاهینی خێزانی و هندرێن عەبدوڵای كچی لە كۆمەڵگەی باگێڕا بەخاك دەسپێردرێن.
كەسوكاری هەردو خێزانەكە داوا دەكەن لێكۆڵینەوەی خێرا لە هۆكاری ڕووداوەكە بكرێت و تاوانباران بە سزای خۆیان بگەیەندرێن.
